Ég elska sándtrakkið úr Beyond the Valley of the Dolls af lífinu! Myndin finnst mér líka reyndar afskaplega skemmtileg. Þessi diskur inni heldur svo mikið grúv að það að hlusta á hann getur látið hina leiðinlegustu mauravinnu virka eins og glamúrös afþreyingu. Ég er búin að hlusta á þennan disk og Trabant nokkurnvegin óslitið til skiptist síðustu vinnudaga, enda er ég búin að vera að skanna og skanna úrklippur eins og sjálfvirk maskína.

Mér finnst Strawberry Alarm Clock lögin alveg sérstaklega flott. En eins er ég gapandi yfir þessum lögum sem eru samin af Philips og Stone sérstaklega fyrir myndina.

Sándtrakkið var fyrst í fyrra gefið út í heild sinni. Lynn Carey sem léði rokkgellunni í myndinni rödd sína var nefnilega samningsbundin plötufyrirtæki sem leyfði ekki að rödd hennar væri notuð á sándtrakkinu. Það hefur því hingað til ekki verið sama söngkona sem syngur í myndinni og á sándtrakkinu. Á nýútgefnum geisladisk hefur söng hennar hinsvegar loksins verið bætt við.